मनाङको शानदार जितमा लामाको ह्याट्रिक

ललित स्मृति यु–१८ फुटबल प्रतियोगितामा मनाङ मस्र्याङ्दी क्लबले हिमालयन शेर्पा क्लबमाथि शानदार जित हात पारेको छ । बुधबार एन्फा कम्प्लेक्स सातदोबाटोमा भएको समूह डी तर्फको दोस्रो खेलमा मनाङले शेर्पालाई ३–० ले हरायो ।

मनाङको जितमा विश्व लामाले ह्याट्रिक गरे । लामाले खेलको १८, ५३ र ७५ औं मिनटमा गोल गर्दै ह्याट्रिक पूरा गरे । त्यसैगरी समूह डी तर्फ कै अर्को खेलमा थ्रीस्टार क्लब र फ्रेण्डस् क्लबले २–२ गोलको बराबरी खेल्दै अंक बाँडेका छन् ।

अखिल नेपाल फुटबल संघ (एन्फा) द्वारा स्वर्गीय ललितकृष्ण श्रेष्ठको स्मृतिमा शुरु प्रतियोगितामा कुल १८ टोलीहरुको सहभागिता रहेको छ । सहभागी टोलीहरुलाई चार समूहमा विभाजन गरिएको छ । प्रत्येक समूहको शिर्ष दुई टोली क्वाटरफाइनलमा प्रवेश गर्नेछन् ।

लिग कम नकआउटका आधारमा सञ्चालन हुने प्रतियोगिताको विजेताले उपाधिसहित नगद ३ लाख प्राप्त गर्नेछ भने उपविजेताले १ लाख ५० हजार हात पार्नेछ । साथै प्रतियोगिताबाट उत्कृष्ट खेलाडीहरु छनौट गरी एएफसी यु–१९ च्याम्पियनसिप छनौटका लागि नेपाली टोली तयार गरिनेछ ।

खेलदैनिक