म्यान्चेस्टर सिटी र लिभरपुल आज भिड्दै

 प्रिमियर लिगका दुई आक्रामक खेलका लागि चिनिने टोली म्यान्चेस्टर सिटी र लिभरपुल आज एक आपसमा भिड्दै छन् । सिटीको घरेलु मैदान एतिहात्त रंगशालामा खेलिने खेल नेपाली समयानुसार बेलुकाको ५ः१५ बजे सुरु हुने छ ।

यस सिजन खेलिएका तीन खेलमा सिटी र लिभरपुल दुवैले २ जित र १ बराबरी खेल्दै ७ अंक बटुलेका छन् । लिगको अघिल्लो खेलमा लिभरपुलले आर्सनललाई ४–० ले हराएको थियो भने म्यान्चेस्टर सिटीले बोर्नमाउथलाई २–१ ले हराएको थियो ।

एभरटर्नसँगको दोस्रो खेलमा रातो कार्ड पाएका कायल वाकर म्यान्चेस्टर सिटीका लागि टोलीमा फर्कँदै छन् । तर बोर्नमाउथसँग रातो कार्ड पाएका लिभरपुलका पूर्व खेलाडी रहिम स्टेर्लिङ भने यस खेलका लागि प्रतिबन्धित छन् । यसैगरी म्यान्चेस्टर सिटीका कप्तान भिन्सेन्ट कम्पनी पिंडौलाको चोटका कारण खेलमा सहभागी हुने छैनन् ।

त्यस्तै लिभरपुलका प्रशिक्षक यर्गन क्लपले मिडफिल्डर फिलिप कौटिन्हो खेल्न फिट नरहेका भन्दै उनलाई टोलीमा समावेश गरेका छैनन् । यसैगरी मिडफिल्डर एडम लल्लाना र रक्षक नाथानियल क्लायन अझै घाइते रहेका क्लपले बताएका छन् ।

म्यान्चेस्टर सिटी घरेलु मैदानमा खेलिएका पछिल्ला १३ खेलमा अपराजित छ भने लिभरपुलले लिगका पछिल्ला ७ खेल गुमाएको छैन । म्यान्चेस्टर सिटी विरुद्ध लिभरपुल पछिल्ला तीन खेलमा अपराजित रहेको छ ।