विश्वकप छनोटमा स्पेनसँग इटाली ३-० ले पराजित

म्याड्रिड (एजेन्सी) – यूरोपको विश्वकप छनोट चरणको खेलअन्तर्गत समूह ‘जी’मा स्पेनले गएराति इटालीलाई ३-० ले हराएको छ । म्याड्रिडको स्यान्टियागो बर्नाबाउमा भएको खेलमा घरेलु टोलीका लागि इस्कोले दुई तथा अल्भारो मोराटाले एक गोल गरेका थिए ।

खेलको १३ औँ मिनेटमा इस्कोले प्रहार गरेको फ्रि-किकलाई रोक्न इटालीका गोलकिपर जियानलुइजी बुफ्फोनले कुनै मौकै पाएनन् । त्यस्तै पहिलो हाफको ४० औँ मिनेटमा इस्कोले डि-एरियाको छेउबाट प्रहार गरेको सटमार्फत स्पेनको अग्रता दोब्बर बनाएका थिए ।

यसैगरी खेलको ६६ औँ मिनेटमा परिवर्तित खेलाडि मोराटाले सर्जियो रामोसको पासको सदुपयोग गर्दै गोलमार्फत स्पेनका लागि जित पक्का गरेका थिए ।

खेलको अन्त्यतिर इस्कोका सट्टा दिग्गज स्ट्राइकर डेभिड भिल्ला पनि मैदानमा छिरेका थिए । २०१४ मा अन्तर्राष्ट्रिय फुटबलबाट सन्न्यास लिएयता स्पेनका लागि यो उनको पहिलो खेल थियो । सामान्यतया रक्षात्मक खेलका लागि चिनिने इटालीको रक्षापंक्ति केहि फतिलो देखिएको थियो ।

यस जितसँगै स्पेन १९ अंकसहित समूह ‘जी’को पहिलो स्थानमा रहन सफल भएको छ । इटाली भने १६ अंक सहित समूहको दोस्रो स्थानमा छ । हरेक समूहबाट मात्र एक टोली स्वत: विश्वकपमा छनोट हुनेछन् ।

हाम्रो खेलकुद